बहुमत भएर पनि मतदान गर्न डराए मुख्यमन्त्री यादव: कांग्रेस र जसपाभित्रको कलहले विश्वासको मत अन्योलमा
मधेस प्रदेशमा सत्ताको लुकामारी: विश्वासको मत लिने कार्यक्रम जेठ ८ गतेलाई सर्यो, आफ्नैले 'धोका' दिने डरमा मुख्यमन्त्री
जनकपुरधाम, मधेस प्रदेश ।
मधेस प्रदेशका मुख्यमन्त्री कृष्णप्रसाद यादवले आज लिने भनिएको विश्वासको मतको कार्यक्रम पछि सरेको छ । सत्ता साझेदार दल जनता समाजवादी पार्टी (जसपा) नेपाल अनिर्णीत बनेको र आफ्नै दल नेपाली कांग्रेसभित्रै 'फ्लोर क्रस'को चर्चा चलेपछि मुख्यमन्त्री यादवले जेठ ८ गतेका लागि नयाँ मिति तय गर्न सभामुखलाई पत्र पठाउनुभएको छ ।
वैशाख २१ गते जनमत पार्टीले सरकारबाट समर्थन फिर्ता लिएपछि मुख्यमन्त्रीले आज (जेठ १ गते) विश्वासको मत लिने कार्यसूची थियो । तर, सत्ता गठबन्धनभित्र चर्किएको विवाद र मत नपाउने निश्चित देखिएपछि अन्तिम समयमा आएर बैठक सारिएको हो ।
जसपा नेपाल र कांग्रेसभित्रको खैलाबैला:
जसपा नेपालका सांसदहरू मुख्यमन्त्रीलाई मत दिने वा नदिने विषयमा दुई धारमा बाँडिएका छन् । जसपाका एक नेताका अनुसार, पार्टीको बैठक अझै जारी छ तर कुनै ठोस निर्णय हुन सकेको छैन । "हाम्रो पार्टी मात्र होइन, मुख्यमन्त्रीकै दल कांग्रेसका केही नेताहरूले समेत 'फ्लोर क्रस' गर्ने तयारी गरेको सुइँको पाएपछि उहाँले बैठक सार्न सभामुख रामअशिष यादवलाई पत्र पठाउनुभएको हो," ती नेताले बताए ।
जनमतको विरोधाभासपूर्ण भूमिका:
सरकारबाट समर्थन फिर्ता लिएको जनमत पार्टीको भूमिका पनि रहस्यमय देखिएको छ । पार्टीले समर्थन फिर्ता लिए पनि जनमतका दुई मन्त्रीहरू महेश यादव र वसन्त कुशवाहा अझै सरकारमै हुनुहुन्छ । यद्यपि, जनमतका संसदीय दलका नेता चन्दन सिंहले भने विश्वासको मतको विपक्षमा मतदान गर्न आफ्ना सांसदहरूलाई ह्विप जारी गरिसक्नुभएको छ ।
अंकगणितको सकस:
१०२ सदस्यीय प्रदेशसभामा ६३ सांसदको समर्थन रहेको दाबी गरिए पनि मुख्यमन्त्री यादवलाई आफ्नै गठबन्धनका सांसदहरूले 'धोका' दिने डरले पिरोलेको छ । जेठ ८ गतेसम्मको समय लिएर सांसदहरूलाई फकाउने र सत्ता जोगाउने रणनीतिमा मुख्यमन्त्री लागेको स्रोतको दाबी छ ।
No comments:
Post a Comment