मधेस सरकारको भविष्यलाई लिएर सत्ता गठबन्धनमा खैलाबैला, लोसपाबाट आएका सांसदहरूको भूमिका शङ्कास्पद

 बहुमत भएर पनि डराए मुख्यमन्त्री यादव: 'फ्लोर क्रस' को त्रासले ११ बजेको बैठक अझै बसेन

मधेस प्रदेशमा सत्ता संकट: आफ्नै सांसदले 'फ्लोर क्रस' गर्ने सुइँको पाएपछि संसद बैठक अन्योलमा

जनकपुरधाम, मधेस प्रदेश ।

मधेस प्रदेशका मुख्यमन्त्री कृष्णप्रसाद यादवले विश्वासको मत लिनका लागि आज बिहान ११ बजे बोलाइएको प्रदेशसभा बैठक अझै बस्न सकेको छैन। सत्ता गठबन्धनभित्रका केही सांसदहरूले 'फ्लोर क्रस' गर्न सक्ने सूचना बाहिरिएपछि बैठक अन्योलमा परेको हो।

​विशेष गरी तत्कालीन लोकतान्त्रिक समाजवादी पार्टी (लोसपा) बाट निर्वाचित भई हाल जनता समाजवादी पार्टी (जसपा) नेपालसँग एकता गरेका केही प्रदेशसभा सदस्यहरूले विपक्षी गठबन्धनलाई साथ दिन सक्ने त्रास सत्ता पक्षमा देखिएको छ। पार्टी एकता भए पनि ती सांसदहरूको भूमिकालाई लिएर जसपा नेपालले आधिकारिक निर्णय गर्न नसक्दा सदनको बैठक सुरु हुन ढिलाइ भएको एक मन्त्रीले जानकारी दिए।

​किन लिँदैछन् विश्वासको मत?

सरकारमा सहभागी जनमत पार्टीले वैशाख २२ गते सरकारलाई दिएको समर्थन फिर्ता लिएपछि मुख्यमन्त्री यादवले संवैधानिक व्यवस्थाअनुसार विश्वासको मत लिन लाग्नुभएको हो। मन्त्रिपरिषद्को वैशाख २८ गतेको बैठकले आज (जेठ १ गते) विश्वासको मत लिने निर्णय गरेको थियो।

​अंकगणित र चुनौती:

१०२ सदस्यीय मधेस प्रदेशसभामा सरकार टिकाउन कम्तीमा ५२ सांसदको समर्थन आवश्यक पर्छ। हाल सरकारसँग ६३ जना सांसदको समर्थन रहेको दाबी गरिएको छ, जसमा:

• ​नेपाली कांग्रेस: २२ जना
• ​जसपा नेपाल: २६ जना
• ​नेकपा (माओवादी केन्द्र/नेकपा एस): १५ जना

​कागजी रूपमा सरकार सुरक्षित देखिए पनि आफ्नै सांसदहरूले मत नदिने वा विपक्षीको पक्षमा मतदान गर्ने ('फ्लोर क्रस') खतरा बढेपछि सत्ता गठबन्धन अहिले आन्तरिक छलफलमा व्यस्त छ। छलफल निष्कर्षमा नपुगेसम्म बैठक सुरु हुने छाँटकाँट देखिएको छैन।