ओलीको स्वास्थ्य र एमालेको 'गयल' उपस्थिति: सुकुम्बासीको आँसु र पार्टीको मौनताबीच गुम्सिँदै राजनीति
काठमाडौँ, वैशाख २६ (दलन न्यूज) ।
नेकपा एमालेका अध्यक्ष केपी शर्मा ओली पित्तथैली र हर्नियाको शल्यक्रियापछि स्वास्थ्य लाभ गरिरहनुभएको छ। तर, अध्यक्ष ओली पूर्ण रूपमा तंग्रिन नसक्दा प्रमुख प्रतिपक्षी दल नेकपा एमालेको राजनीतिक सक्रियता नै 'थलिएको' जस्तो देखिएको छ।
निर्वाचन समीक्षादेखि पार्टीका आवधिक बैठकहरू समेत बस्न नसक्दा राष्ट्रिय राजनीतिका महत्त्वपूर्ण मुद्दाहरूमा एमालेको उपस्थिति कमजोर बन्दै गएको भन्दै पार्टीभित्रै चिन्ता व्यक्त हुन थालेको छ।
१५ हजार सुकुम्बासी बेघर, सेल्टरमा मानवीय संकट
सरकारले काठमाडौँका विभिन्न स्थानमा डोजर चलाएर १५ हजारभन्दा बढी सुकुम्बासी र अव्यवस्थित बसोबासीलाई बेघर बनाएको छ। हाल अस्थायी सेल्टरमा रहेका विस्थापितहरूको अवस्था दयनीय बन्दै गएको छ।
- शिक्षा र स्वास्थ्यमा अवरोध: बालबालिकाहरू विद्यालय जान पाएका छैनन् भने बिरामीहरूले नियमित औषधि खान नपाएको गुनासो गरेका छन्।
- मानवअधिकार समितिको अनुगमन: संसदीय समितिका सदस्यहरू अनुगमनमा जाँदा विस्थापितहरूले सरकारको बलजफ्ती कार्यशैलीले आफूहरू त्रस्त बनेको र रोजीरोटी गुमेको बताएका छन्।
गृह मन्त्रालयले ७७ वटै जिल्लामा सरकारी जग्गा खाली गर्न दिएको निर्देशनले देशभरका १२ लाखभन्दा बढी परिवार तरंगित भएका छन्। यसबाट झण्डै ५० लाख मानिस प्रभावित हुने प्रक्षेपण गरिएको छ।
अध्यक्ष नआएसम्म बैठक नबस्ने
एमाले सचिव राजन भट्टराईका अनुसार अध्यक्ष ओली हिँडडुल गर्न सक्ने नभएसम्म पार्टीका औपचारिक बैठकहरू बस्ने सम्भावना छैन।
भट्टराईले भन्नुभयो, "हिरासतमुक्त भएर आइसकेकाले उहाँकै अध्यक्षतामा बैठक बस्नुपर्छ। तर अहिले उहाँ हिँडडुल गर्न सक्ने अवस्थामा हुनुहुन्न। बुधबार सुदूरपश्चिमका सांसदहरूसँग सामान्य छलफल बाहेक उहाँ अन्य गतिविधिमा सरिक हुन सक्नुभएको छैन।"
पार्टीको 'गयल' उपस्थितिप्रति नेताहरूको चिन्ता
देशमा सुकुम्बासी समस्या, भूमिसम्बन्धी विवाद र कूटनीतिक उथलपुथल भइरहँदा ठूलो दल एमालेको स्पष्ट धारणा आउन नसक्नुलाई कतिपय नेताहरूले 'गयल' भएको रूपमा अर्थ्याएका छन्। नेतृत्वको स्वास्थ्यका कारण नीतिगत निर्णयहरू र आगामी कार्यदिशा तय गर्न ढिलाइ भइरहेको एमाले वृत्तमा चर्चा छ।
No comments:
Post a Comment