दुई जिल्लाका स्थानीयबीच भीषण झडप, ६ जना रगताम्मे! प्रमुख प्रशासकीय अधिकृत र प्रहरी कमाण्डर पनि घाइते! ४ जनालाई हेलिकप्टरबाट उद्धार गरिँदै!
Dalan News Bureau जेठ ७ गते ।
हुम्ला र बाजुरा जिल्लाको सीमावर्ती क्षेत्रमा अस्थायी प्रहरी चौकी निर्माण गर्ने विषयलाई लिएर दुई जिल्लाका स्थानीयवासीबीचको विवादले उग्र रूप लिएको छ। सीमा क्षेत्रमा भएको हिंसात्मक झडपमा परी ६ जना गम्भीर घाइते भएका छन् भने स्थिति नियन्त्रण बाहिर गएपछि चार जनालाई हेलिकप्टरमार्फत उद्धार गरी थप उपचारका लागि सुर्खेत पठाइएको छ।
बाजुराको हिमाली गाउँपालिका–३ स्थित लाम्पाटामा दुई जिल्लाका बासिन्दाहरूबीच ढुङ्गामुढा र हतियारसहित झडप भएको हो। झडपमा परी स्थानीयवासी मात्र होइन, ड्युटीमा खटिएका एक प्रहरी अधिकारी र गाउँपालिकाका प्रमुख प्रशासकीय अधिकृत समेत घाइते भएका छन्।
किन भयो झडप? यस्तो छ विवादको मुख्य चुरो
हुम्लाको नाम्खा, ताजाकोट, सर्केगाड र खार्पुनाथ गाउँपालिकासँग जोडिएको सीमावर्ती क्षेत्र लाम्पाटामा सुरक्षा संवेदनशीलतालाई मध्यनजर गर्दै अस्थायी प्रहरी चौकी स्थापना गर्ने निर्णय भएको थियो। सोही निर्णय अनुसार प्राविधिकसहितको टोली चौकी निर्माणका लागि जग्गा नापजाँच र संरचना बनाउन लाम्पाटा पुगेको थियो।
तर, हुम्लाका स्थानीयवासीले बाजुरा पक्षले ‘कवाडी खोलाभन्दा वारिपट्टि (हुम्लातर्फ) आएर जबरजस्ती संरचना बनाउन खोजेको’ भन्दै तीव्र विरोध गरे। कवाडी खोलालाई सीमा मान्नुपर्ने हुम्ला पक्षको दाबी र सो क्षेत्र आफ्नो भएको बाजुरा पक्षको अडानका बीच भनाभन हुँदाहुँदै विवादले एकाएक हिंसात्मक रूप लिएको हो।
प्रशासकीय अधिकृत र प्रहरी हवल्दार पनि घाइते, ४ को अवस्था चिन्ताजनक
जिल्ला प्रहरी कार्यालय बाजुराका सूचना अधिकारी तथा प्रहरी निरीक्षक नरेशबहादुर शाहीका अनुसार झडपमा परी टाउको र शरीरमा गम्भीर चोट लागेका पेमा गारा गुरुङ, लक्ष्मी गुरुङ, मीन कुँवर र नरबहादुर गुरुङलाई नेपाली सेनाको हेलिकप्टरमार्फत उद्धार गरी सुर्खेत रिफर गरिएको छ।
झडपकै क्रममा प्रहरी चौकी बिच्छ्यामा कार्यरत प्रहरी सहायक हवल्दार महेश धामी र हिमाली गाउँपालिकाका प्रमुख प्रशासकीय अधिकृत कुलबहादुर थापा समेत घाइते भएका छन्।
कर्णाली कोरिडोर बन्द गर्ने घोषणा, सीमामा सेना र प्रहरी तैनाथ
यो घटनापछि सीमा क्षेत्रमा थप हिंसा भड्किन नदिन स्थानीय प्रशासनले ठूलो संख्यामा सुरक्षाकर्मी तैनाथ गरी सुरक्षा व्यवस्था निकै कडा पारेको छ।
यसैबीच, घटनाको विरोधमा हिमाली गाउँपालिकाका आक्रोशित युवाहरूले एक विज्ञप्ति जारी गर्दै बाजुरा हुँदै कर्णाली करिडोर मार्गबाट हुम्लातर्फ जाने सम्पूर्ण यातायातका साधन र उपभोग्य सामग्री ढुवानी अनिश्चितकालका लागि ठप्प पार्ने घोषणा गरेका छन्। यातायात रोकिने भएपछि हुम्लामा खाद्यान्न र अत्यावश्यक सामग्रीको संकट हुन सक्ने खतरा बढेको छ। स्थानीय प्रशासनले दुवै जिल्लाका नागरिकलाई संयमता अपनाउन र सामाजिक सद्भाव कायम राख्न अपिल गरेको छ।
No comments:
Post a Comment