पूर्वप्रधनमन्त्री सुशीला कार्कीको पत्रकारसँग रुखो व्यवहार: ‘मलाई होइन, बालेनकी श्रीमतीलाई आमा भन’
काठमाडौँ, वैशाख २६ (दलन न्यूज) ।
कुनै समय प्रधानमन्त्री वालेन्द्र शाहलाई सार्वजनिक रूपमै आफ्नो ‘छोरो’ भनेर सम्बोधन गर्ने पूर्वप्रधानन्यायाधीश सुशीला कार्की शनिबार भने पत्रकारसँग निकै आक्रोशित रूपमा प्रस्तुत हुनुभएको छ। काठमाडौँस्थित राष्ट्रिय सभा गृहमा कानुन दिवसको अवसरमा आयोजित कार्यक्रमबाट बाहिरिने क्रममा पत्रकार दिवाकर साहले प्रतिक्रिया लिन खोज्दा कार्कीले निकै रुखो शैलीमा जवाफ फर्काउनुभएको हो।
प्रधानन्यायाधीश सिफारिसमा वरिष्ठता मिचिएको विषयलाई लिएर असन्तुष्ट रहँदै आउनुभएकी कार्कीको यो व्यवहारले अहिले सामाजिक सञ्जालमा नयाँ बहस छेडिदिएको छ।
१. संवादको नालीबेली: ‘आमा दर्शन’ देखि ‘आमा फेरिसक्यो’ सम्म
कार्यक्रम सकेर बाहिरिँदै गर्दा पत्रकार झाले कार्कीलाई ‘आमा दर्शन’ भन्दै शिष्टाचार प्रकट गरेका थिए। तर, कार्कीले तत्कालै असन्तुष्टि जनाउँदै सोध्नुभयो, “कोले आमा भनेको?”
झाले आफूले सम्बोधन गरेको बताएपछि कार्कीले आक्रोशपूर्ण शैलीमा भन्नुभयो, “तिमीहरूको आमा नै फेरिसक्यो।” पत्रकार झाले ‘केही फरक पर्दैन, आमा फेरिँदैन’ भन्दै सम्झाउन खोजे पनि कार्की झन् कडा रूपमा प्रस्तुत हुनुभयो।
२. सविना काफ्लेतिर सङ्केत
कार्कीले आफूलाई आमा नभन्न चेतावनी दिँदै प्रधानमन्त्री पत्नी सविना काफ्लेलाई आमा भन्न सुझाव दिनुभयो। उहाँले भन्नुभयो, “बालेन शाहको श्रीमतीलाई आमा भन।” काफ्लेतर्फ सङ्केत गर्दै उहाँले थप प्रतिप्रश्न गर्नुभयो, “आमा होइन? बच्चाको आमा होइन?”
पत्रकार झाले कार्कीलाई ‘देशकै आमा’ भएको र देश सङ्कटमा पर्दा उहाँले खेलेको ऐतिहासिक भूमिकाको स्मरण गराउन खोजे पनि कार्की ‘होइन, होइन’ भन्दै त्यहाँबाट बाहिरिनुभयो।
३. प्रधानमन्त्रीसँगको फेरिएको सम्बन्ध?
यसअघि पूर्वप्रधानन्यायाधीश कार्कीले प्रधानमन्त्री वालेन्द्र शाहलाई सार्वजनिक मञ्चहरूबाटै ‘मेरो छोरो’ भन्ने गर्नुहुन्थ्यो। तर, पछिल्लो समय संवैधानिक परिषद्ले प्रधानन्यायाधीश पदमा चौथो वरीयताका डा. मनोजकुमार शर्मालाई सिफारिस गरेपछि कार्की प्रधानमन्त्री शाहसँग निकै चिढिनुभएको देखिन्छ। कामु प्रधानन्यायाधीश सपना प्रधान मल्ललाई पाखा लगाएर गरिएको यो सिफारिसलाई उहाँले ‘न्यायपालिकामाथिको गम्भीर त्रुटि’ भन्दै आउनुभएको छ।
४. सामाजिक सञ्जालमा प्रतिक्रियाको ओइरो
पत्रकार दिवाकर झाले आफ्नो फेसबुक पेजमार्फत सार्वजनिक गरेको यो भिडियो अहिले डढेलोझैँ फैलिएको छ। धेरैले यसलाई कार्कीको राजनीतिक र न्यायिक असन्तुष्टिको चरम रूप मानेका छन् भने बालेनका समर्थकहरूले उहाँको यो रुखो शैलीप्रति आश्चर्य प्रकट गरेका छन्।
No comments:
Post a Comment