एमालेको गम्भीर आरोप: "सरकार न्यायालयभित्र आफ्ना 'पक्षधर' खोज्दैछ"
नेकपा एमालेका महासचिव शंकर पोखरेलले वर्तमान सरकारको कदमले मुलुकलाई अधिनायकवादतर्फ धकेल्न खोजेको भन्दै कडा टिप्पणी गर्नुभएको छ। संवैधानिक परिषद्ले वरिष्ठता मिचेर गरेको सिफारिसलाई उहाँले 'नियोजित' कदमको संज्ञा दिनुभएको छ।
महासचिव पोखरेलले सरकारको नियतमाथि प्रश्न उठाउँदै भन्नुभएको छ:
"संसद् स्थगन गरेर अध्यादेशमार्फत निर्णय गरिनु केवल प्रक्रियागत विषय होइन, यसको नियतमाथि नै प्रश्न उठेको थियो। त्यसको स्पष्ट संकेत संवैधानिक परिषद्को निर्णयमा देखियो। सायद वर्तमान सरकार अहिले न्यायालयभित्र आफ्ना पक्षमा न्यायिक पक्षधरता स्थापित गर्न खोजिरहेको हुनुपर्दछ।"
पोखरेलले अगाडि भन्नुभएको छ कि यस किसिमको हस्तक्षेपले संसदीय लोकतन्त्रको 'शक्ति सन्तुलन' को सिद्धान्तलाई कमजोर बनाउनेछ। उहाँका अनुसार, यस्ता कदमहरूले मुलुकमा अधिनायकवादको जोखिम बढाएको छ।
एमालेको यो आधिकारिक धारणासँगै प्रधानन्यायाधीश नियुक्ति प्रक्रिया अब केवल कानुनी मात्र नभई राजनीतिक 'आर या पार' को विषय बनेको छ।
No comments:
Post a Comment