सी-ट्रम्प वार्ता: टेम्पल अफ हेभनको भ्रमण र 'मन्डेट अफ हेभन'को चर्चा

• बेइजिङको टेम्पल अफ हेभनमा सी र ट्रम्प: 'जनता नै राज्यको आधार' भन्दै सीले दिए कूटनीतिक सन्देश
• चिनियाँ राष्ट्रपति सी र अमेरिकी राष्ट्रपति ट्रम्पबीच बेइजिङमा ऐतिहासिक भेटवार्ता
  

  चिनियाँ राष्ट्रपति सी जिनपिङ र अमेरिकी राष्ट्रपति डोनल्ड ट्रम्पले बिहीबार बेइजिङस्थित ऐतिहासिक टेम्पल अफ हेभन (Temple of Heaven) को भ्रमण गर्नुभएको छ । राष्ट्रपति ट्रम्पको चीन भ्रमणका क्रममा दुई नेताहरूले यस ऐतिहासिक स्थलको भ्रमण गर्दै कूटनीतिक र सांस्कृतिक महत्वका विषयमा छलफल गर्नुभएको हो ।

  ​भ्रमणका क्रममा राष्ट्रपति सीले ट्रम्पलाई यस मन्दिरको ऐतिहासिक पृष्ठभूमिबारे जानकारी गराउनुभएको थियो । प्राचीन समयमा चिनियाँ शासकहरूले यस स्थलमा राष्ट्रिय समृद्धि, सामाजिक सद्भाव र राम्रो उब्जनीका लागि प्रार्थना गर्ने गरेको सीले बताउनुभयो ।

  ​सीको कूटनीतिक सन्देश:

  भ्रमणका क्रममा राष्ट्रपति सीले चिनियाँ राज्य दर्शनको व्याख्या गर्दै भन्नुभयो, "यसले चिनियाँ परम्परागत अवधारणालाई झल्काउँछ कि जनता नै राज्यको आधार हुन् र जब आधार बलियो हुन्छ, तब मात्र राज्य स्थिर रहन्छ ।"

  ​विश्लेषकहरूका अनुसार, तनावपूर्ण वैदेशिक सम्बन्ध र व्यापारिक द्वन्द्वका बीच 'टेम्पल अफ हेभन'को छनोटले बेइजिङले सद्भाव र स्थिरताको सन्देश दिन खोजेको देखिन्छ । दुई नेताहरूले त्यहाँको 'हल अफ प्रेयर फर गुड हार्भेस्ट' (राम्रो उब्जनीका लागि प्रार्थना कक्ष) को पनि अवलोकन गर्नुभएको थियो, जसलाई कतिपयले अमेरिका-चीन व्यापार वार्तामा 'राम्रो उब्जनी' वा सकारात्मक परिणामको अपेक्षाका रूपमा अथ्र्याएका छन् ।

  ​भ्रमणका क्रममा ट्रम्पले चीनको प्रशंसा गर्दै यसलाई 'अविश्वसनीय र सुन्दर' ठाउँको रूपमा टिप्पणी गर्नुभएको थियो । यो भ्रमण सन् २०२६ लाई दुई देशबीचको सम्बन्धमा नयाँ अध्याय सुरु गर्ने वर्ष बनाउने प्रयासको एक हिस्सा मानिएको छ ।