सरकारका कदमबाट भाग्नु पर्दैन, देश अब ‘ट्रयाक’ मा आयो: रास्वपा सभापति रवि लामिछाने
सरकारका कदमबाट भाग्नु पर्दैन, देश अब ‘ट्रयाक’ मा आयो: रास्वपा सभापति रवि लामिछाने
काठमाडौँ, वैशाख २८ (दलन न्यूज) ।
राष्ट्रिय स्वतन्त्र पार्टी (रास्वपा) का सभापति एवं उपप्रधान तथा गृहमन्त्री रवि लामिछानेले वर्तमान सरकारले हरेक कदम सोचेर र विचार गरेर मात्र चालिरहेको दाबी गर्नुभएको छ। पार्टीबाट प्रतिनिधि सभामा निर्वाचित सांसदहरूका लागि आयोजित दुई दिने प्रशिक्षण कार्यक्रमलाई आइतबार सम्बोधन गर्दै लामिछानेले सरकारका कामप्रति गौरव गर्न आफ्ना जनप्रतिनिधिहरूलाई आग्रह गर्नुभयो।
१. प्रश्नबाट नभाग्न सांसदहरूलाई सुझाव
सभापति लामिछानेले सरकारले चालेका कदम र आएका प्रतिक्रियाहरूका कारण कतिपय अवस्थामा सांसदहरूलाई प्रश्नको सामना गर्न अप्ठ्यारो परेको हुनसक्ने स्वीकार गर्नुभयो। "विभिन्न कोणबाट आएका प्रतिक्रिया र समालोचनाले हामीलाई सोच्न बाध्य बनाएको हुनसक्छ," लामिछानेले भन्नुभयो, "तर तपाईँहरू निर्धक्क हुनुहोस्, सरकारले हेरेर र विचार गरेर कदम चालिरहेको छ। सरकारले गरेका कामहरूमा दुःखमनाउ गरेर भाग्नु पर्दैन।"
२. अध्यादेश र 'फास्ट ट्रयाक' को बचाउ
पछिल्लो समय सरकारले ल्याएका अध्यादेशहरूबारे उठिरहेका प्रश्नहरूबारे स्पष्ट पार्दै लामिछानेले जनतालाई छिटो लाभ दिन 'फास्ट ट्रयाक' बाट कानुन बनाउनुपरेको तर्क गर्नुभयो। उहाँले देश र नागरिकलाई घाटा हुने कुनै पनि निर्णय रास्वपाले नगर्ने र गर्न पनि नदिने प्रतिबद्धता जनाउनुभयो।
३. ट्रयाकबाहिर रहेको देश ट्रयाकमा आयो
लामिछानेले विगतमा बेथिति र भद्रगोलका कारण 'ट्रयाक' बाहिर पुगेको देश अहिले बिस्तारै लयमा फर्किएको दाबी गर्नुभयो। "हिजो ट्रयाकबाहिर रहेको देश अहिले ट्रयाकमा आइरहेको छ," उहाँले भन्नुभयो, "देश झुक्ने र नागरिकलाई अप्ठ्यारो पार्ने कुनै पनि काम हामीबाट हुँदैन।"
४. सबै दलको मतले रास्वपाको उदय
रास्वपाको वर्तमान हैसियत केवल आफ्ना समर्थकको मात्र नभई कांग्रेस, एमाले र नेकपा माओवादी जस्ता परम्परागत दलका मतदाताले समेत परिवर्तनको आशामा भोट दिएका कारण सम्भव भएको लामिछानेको भनाइ थियो। उहाँले जनताको त्यो भरोसालाई आत्मसात् गरेर काम गर्न सांसदहरूलाई निर्देशन दिनुभयो।
No comments:
Post a Comment