चरम आर्थिक संकटका बीच पाकिस्तानद्वारा रक्षा बजेटमा भारी वृद्धिको तयारी: सैन्य खर्च १०० अर्ब भारुले बढाउने योजना
पाकिस्तानको ठूलो तयारी: कङ्गाल बन्ने अवस्थामा पुग्दा पनि रक्षा बजेटमा १०० अर्ब थप्ने योजना !
इस्लामावाद ।
विश्वव्यापी भू-राजनीतिक तनाव र चरम आन्तरिक आर्थिक संकटका बीच पाकिस्तानले आफ्नो आगामी आर्थिक वर्ष २०२६–२७ का लागि रक्षा बजेटमा ठुलो वृद्धि गर्ने तयारी गरेको छ। अन्तर्राष्ट्रिय मुद्रा कोष (IMF) को कडा सुधार कार्यक्रम र ऋण सम्झौताका बीच सरकारले सैन्य खर्चमा करिब १०० अर्ब पाकिस्तानी रुपैयाँ (PKR) थप्ने योजना बनाएको हो।
मिडिया रिपोर्टहरूका अनुसार यो वृद्धिसँगै पाकिस्तानको कुल रक्षा बजेट २.६६ ट्रिलियन (२,६६५ अर्ब) पाकिस्तानी रुपैयाँ पुग्नेछ। पाकिस्तान सरकारले आईएमएफको नीतिको अधिनमा रही नयाँ वित्तीय बजेटको मस्यौदा तयार पारिरहेका बेला रक्षा क्षेत्रको यो ठुलो विकासक्रम बाहिर आएको हो।
बजेट वृद्धिका मुख्य कारणहरू र आईएमएफको प्रक्षेपण:
आईएमएफले आगामी आर्थिक वर्ष २०२६–२७ मा पाकिस्तानको कुल संघीय राजस्व १७.१४४ ट्रिलियन रुपैयाँ पुग्ने प्रक्षेपण गरेको छ, जुन चालु आर्थिक वर्षको तुलनामा २ ट्रिलियन रुपैयाँभन्दा बढी हो। राजस्व बढ्ने अनुमान गरिएकै कारण सरकारले आफ्नो राष्ट्रिय सुरक्षा र सैन्य आधुनिकीकरणका लागि बजेट बढाउने हिम्मत गरेको विश्लेषकहरूको भनाइ छ।
पाकिस्तानले बजेट बढाउनुको पछाडि मुख्य दुई कारणहरू छन्:
१. क्षेत्रीय सुरक्षा र आतंकवाद: पाकिस्तानको पश्चिमी सिमाना (अफगानिस्तानसँग जोडिएको क्षेत्र) मा बढ्दो आतङ्कवादी गतिविधि र आन्तरिक सुरक्षा चुनौती।
२. विश्वव्यापी सैन्य होडबाजी: इरान युद्ध र मध्यपूर्वको तनावका कारण फेरिएको क्षेत्रीय सन्तुलनमा आफ्नो सैन्य उपस्थितिलाई बलियो राखिराख्ने रणनीतिक योजना।
जनतालाई महँगीको मार, सेनालाई राहत:
पाकिस्तान लामो समयदेखि वैदेशिक ऋण, उच्च मुद्रास्फीति (महँगी) र आर्थिक मन्दीसँग जुधिरहेको छ। यस्तो अवस्थामा सामाजिक सुरक्षा, शिक्षा र स्वास्थ्य बजेट कटौती गरेर वा वैदेशिक ऋणको आडमा सैन्य खर्च बढाउने सरकारको यो योजनाको देशभित्रै आलोचना समेत सुरु भएको छ। तर, पाकिस्तानी राजनीतिमा सेनाको बलियो प्रभाव र सुरक्षा संवेदनशीलताका कारण रक्षा बजेटमा कैंची चलाउन सरकार असमर्थ देखिँदै आएको छ।
No comments:
Post a Comment