सम्झौताको मसी नसुक्दै उड्यो युद्धविरामको धज्जी: इजरायलको नियतमाथि लेबनानमा प्रश्न, दर्जनाौँ घाइते

 वासिङ्टनमा वार्ता, लेबनानमा रगत: ४५ दिने युद्धविरामको घोषणा लगत्तै इजरायली सेनाद्वारा टायर र हानुफमा मिसाइल प्रहार

युद्धविराम थपिएको केही घण्टामै लेबनानमा इजरायलको भीषण बमबारी: स्वास्थ्य केन्द्र ध्वस्त, ३ स्वास्थ्यकर्मीसहित ९ जनाको मृत्यु

बेइजिङ/वासिङ्टन ।

अमेरिकाको वासिङ्टनमा इजरायल र लेबनानबीच युद्धविरामलाई थप ४५ दिन लम्ब्याउने सहमति भएको केही घण्टामै इजरायली वायुसेनाले दक्षिण लेबनानमा भीषण हवाई आक्रमण गरेको छ। अमेरिकी विदेश मन्त्रालयले वार्ता "अत्यन्तै फलदायी" भएको र युद्धविराम थपिएको घोषणा गरेको केही मिनेटमै इजरायलले लेबनानी भूमिमा क्षेप्यास्त्र बर्साउन सुरु गरेको हो।

​शनिबार (मे १६) भएको यस ताजा आक्रमणमा कम्तीमा ९ जनाको मृत्यु भएको छ भने दर्जनौँ नागरिक घाइते भएका छन्। लेबनानी स्वास्थ्य मन्त्रालयका अनुसार, दक्षिण लेबनानको हानुफ (Hanuf) सहरमा रहेको हिजबुल्लाह सम्बद्ध 'इस्लामिक हेल्थ कमिटी' को प्राथमिक स्वास्थ्य केन्द्रलाई निशाना बनाएर इजरायलले हवाई हमला गरेको थियो। उक्त आक्रमणमा स्वास्थ्य केन्द्र पूर्ण रूपमा ध्वस्त भएको छ भने ड्युटीमा रहेका ३ जना प्यारामेडिक्स (स्वास्थ्यकर्मी) सहित ६ जनाको घटनास्थलमै मृत्यु भएको छ।

​टायर सहरमा कडा नोक्सानी, सर्वसाधारण विस्थापित:

इजरायली सेनाले खाली गर्ने (इभ्याकुएसन) आदेश जारी गरेलगत्तै ऐतिहासिक तटीय सहर टायर (Tyre) र त्यस आसपासका क्षेत्रमा पनि भीषण बमबारी गरेको छ। टायर जिल्लामा भएका हमलाहरूमा अस्पतालका ६ जना कर्मचारी, ९ जना महिला र ४ जना बालबालिकासहित कम्तीमा ३७ जना घाइते भएका छन्।

​स्थानीय बासिन्दा हाफेज रमदानका अनुसार इजरायलले निशाना बनाएको भवनमा युद्धका कारण विस्थापित भएका सर्वसाधारण, महिला र वृद्धवृद्धाहरू बस्दै आएका थिए। यो आक्रमणपछि उनीहरू फेरि सडकमा आउन बाध्य भएका छन्।

​इजरायल र हिजबुल्लाहको आफ्नै दाबी:

इजरायली डिफेन्स फोर्सेज (IDF) ले आफूहरूले युद्धविराम उल्लङ्घन नगरेको दाबी गरेको छ। इजरायलका अनुसार यो सम्झौता लेबनान सरकारसँग भएको हो र यसमा हिजबुल्लाह सामेल छैन। त्यसैले दक्षिण लेबनानमा सक्रिय हिजबुल्लाहको सैन्य पूर्वाधार र लडाकुहरूलाई सिध्याउन गरिने कारबाही जारी रहने इजरायलको अडान छ। इजरायलले गत हप्ता मात्रै २२० भन्दा बढी हिजबुल्लाह लडाकु मारेको दाबी गरेको छ।

​यता, हिजबुल्लाहले पनि इजरायली सेनामाथि प्रतिशोधात्मक कारबाही जारी राखेको छ। हिजबुल्लाहका लडाकुहरूले इजरायलको उत्तरी सहर किरियत श्मोना (Kiryat Shmona) मा रहेका सैन्य ब्यारेकहरूलाई निशाना बनाएर 'सुसाइड ड्रोन' र एन्टि-ट्याङ्क मिसाइल प्रहार गरेका छन्। दक्षिणी लेबनानमा भएको भिडन्तमा थप एक इजरायली सैनिक मारिएका छन्, जससँगै मार्च महिनादेखि सुरु भएको यो युद्धमा ज्यान गुमाउने इजरायली सैनिकको सङ्ख्या १९ पुगेको छ।

​मानवीय संकट गहिरिँदै:

लेबनानका लागि संयुक्त राष्ट्र सङ्घका मानवीय संयोजक इमरान रिजाले कूटनीतिक प्रयास भइरहँदा पनि जमिनमा नागरिकहरू मारिने क्रम नरोकिनु "अत्यन्तै चिन्ताजनक" भएको बताउनुभएको छ। गत मार्च २ देखि सुरु भएको यो युद्धमा लेबनानमा मात्रै हालसम्म २ हजार ९५० भन्दा बढी मानिसको मृत्यु भइसकेको छ, जसमा अप्रिल १७ मा पहिलो पटक युद्धविराम लागू भएयता मात्रै ४०० भन्दा बढीले ज्यान गुमाएका छन्।