"हिजोको गुरुकुल आज चिया पसल भयो?"– संसद्मा कांग्रेस सचेतक निश्कल राईको गर्जन!
"सदन गुरुकुल हो, चिया पसल होइन": कांग्रेस सचेतकले सम्झाए रास्वपालाई मनिष झाको पुरानो भाषण
"सदन गुरुकुल हो, चिया पसल होइन": कांग्रेस सचेतकले सम्झाए रास्वपालाई मनिष झाको पुरानो भाषण
काठमाडौँ (दलन न्यूज) ।
सरकारको नीति तथा कार्यक्रममाथिको छलफलमा प्रधानमन्त्री बालेन्द्र शाह (बालेन) अनुपस्थित भएपछि संसद्मा सत्तापक्ष र विपक्षीबीच आरोप-प्रत्यारोप चर्किएको छ। बिहीबारको प्रतिनिधिसभा बैठकमा बोल्दै नेपाली कांग्रेसका सचेतक निश्कल राईले प्रधानमन्त्रीले संसद्लाई बेवास्ता गरेको भन्दै कडा आलोचना गर्नुभएको छ।
सचेतक राईले अहिले सत्तामा रहेको राष्ट्रिय स्वतन्त्र पार्टी (रास्वपा) का सांसदले विगतमा संसद्को गरिमाबारे दिएको अभिव्यक्ति स्मरण गराउँदै सरकारको 'दोहोरो चरित्र' माथि प्रश्न उठाउनुभएको हो।
१. मनिष झाको त्यो भाइरल अभिव्यक्ति
सचेतक राईले २३ चैत २०८२ मा रास्वपा सांसद मनिष झाले सदनमा बोलेको कुरा उधृत गर्दै भन्नुभयो:
"सदन एउटा चिया पसल र चौतारी होइन जहाँ मन लागे आउँछु, मन लागे बोल्छु, मन लागे बस्छु, नमन लागे जान्छु भन्ने होइन। सदन गुरुकुल हुनुपर्छ, विश्वविद्यालय हुनुपर्छ।"
राईले अगाडि भन्नुभयो, "विगतमा रास्वपाका साथीहरूले सदनलाई विश्वविद्यालय बनाउनुपर्छ, यहाँ होमवर्क गरेर आउनुपर्छ भन्नुभएको थियो। तर आज त्यही विश्वविद्यालयमा प्रधानमन्त्रीले 'क्लास बंक' गरिरहनुभएको छ। के सदन अहिले चिया पसल भएको हो?"
२. "प्रधानमन्त्रीले होमवर्क गर्न डराउनुभएको हो?"
विपक्षी दलहरूले नीति तथा कार्यक्रममा उठेका प्रश्नको जवाफ प्रधानमन्त्रीले नै दिनुपर्ने अडान राख्दै आएका छन्। तर, आजको कार्यसूचीमा अर्थमन्त्री डा. स्वर्णिम वाग्लेले जवाफ दिने उल्लेख भएपछि कांग्रेसले यसलाई 'संवैधानिक जिम्मेवारीबाट भागिएको' रूपमा व्याख्या गरेको छ। "जनताका प्रतिनिधिले सोधेका प्रश्नको सामना गर्न प्रधानमन्त्रीलाई किन डर लागेको?" राईले प्रश्न गर्नुभयो।
३. रास्वपाको 'यू-टर्न' माथि व्यङ्ग्य
विगतमा प्रतिपक्षमा हुँदा संसद्मा प्रधानमन्त्रीको अनिवार्य उपस्थितिको वकालत गर्ने रास्वपाका मन्त्री र सांसदहरू अहिले सरकारमा पुगेपछि मौन बसेकोमा विपक्षीले आक्रोश पोखेका छन्। सचेतक राईले थप्नुभयो, "हिजो गुरुकुलको कुरा गर्ने साथीहरू आज कुन गुफामा हुनुहुन्छ? आफ्नै शब्दहरूले आज उहाँहरूलाई गिज्याइरहेको छ।"
४. सदनको गतिरोध कायमै
कांग्रेससहितका विपक्षी दलहरूले प्रधानमन्त्री रोस्ट्रममा नउभिएसम्म सदन सहज रूपमा चल्न नदिने सङ्केत दिएका छन्। यद्यपि, सभामुखले अर्थमन्त्रीलाई जवाफ दिने समय उपलब्ध गराएका छन्, जसलाई विपक्षीले नारावाजीका बीच विरोध गर्ने सम्भावना प्रबल छ।
No comments:
Post a Comment