काठमाडौँ ।
काठमाडौँ उपत्यका अपराध अनुसन्धान कार्यालयले शुक्रबार उपत्यकाभित्र सञ्चालित विभिन्न ९५ वटा शैक्षिक परामर्श (कन्सल्टेन्सी) संस्थाहरूमा एकैसाथ छापा मारेको छ। शैक्षिक परामर्शका नाममा ठगी, अवैध आर्थिक कारोबार र नक्कली कागजात बनाउने गरेको उजुरी र आशंकाका आधारमा प्रहरीले यो 'मगा अप्रेशन' चलाएको हो।
छापा मार्ने क्रममा प्रहरीले विभिन्न कन्सल्टेन्सीका सञ्चालक र कर्मचारीसहित ६९ जनालाई नियन्त्रणमा लिएको छ। उपत्यका अपराध अनुसन्धान कार्यालयका प्रवक्ता एवं एसपी रामेश्वर कार्कीका अनुसार पक्राउ परेकाहरूमाथि अहिले 'स्क्रिनिङ' गर्ने काम भइरहेको छ र दोषी देखिएकाहरूमाथि थप कानुनी कारबाही अघि बढाइनेछ।
किन भयो छापा?
प्रहरीका अनुसार कतिपय कन्सल्टेन्सीहरूले दर्ता बिना नै सेवा सञ्चालन गरिरहेको, विद्यार्थीहरूलाई विदेश पठाउने बहानामा ठुलो रकम ठगी गरेको र नक्कली शैक्षिक प्रमाणपत्र तथा बैंक ब्यालेन्स सर्टिफिकेट तयार गर्ने गरेको सूचना प्राप्त भएको थियो।
"शैक्षिक परामर्शको आवरणमा भइरहेका अवैध गतिविधि रोक्न हामीले यो कदम चालेका हौँ," एसपी कार्कीले भन्नुभयो, "पक्राउ परेकाहरूको संलग्नता र कागजातको वैधता जाँच गरेपछि थप तथ्यहरू बाहिर आउनेछन्।"
उपत्यकाका पुतलीसडक, बानेश्वर, बागबजार र ललितपुरका मुख्य क्षेत्रहरूमा रहेका कन्सल्टेन्सीहरूमा प्रहरी टोलीले छापा मारेको थियो। यस कारबाहीले शैक्षिक परामर्श क्षेत्रमा आबद्ध व्यवसायीहरूबीच ठुलो तरंग पैदा गरेको छ।
No comments:
Post a Comment