ज्ञानेन्द्र शाहीको बालेनमाथि कटाक्ष: ‘संसदमा र्याप हान्न वा पप गीत गाउन बोलाएको होइन, जवाफ चाहियो’
ज्ञानेन्द्र शाहीको बालेनमाथि कटाक्ष: ‘संसदमा र्याप हान्न वा पप गीत गाउन बोलाएको होइन, जवाफ चाहियो’
काठमाडौँ (दलन न्यूज) ।
राष्ट्रिय प्रजातन्त्र पार्टी (राप्रपा) का प्रमुख सचेतक एवं सांसद ज्ञानेन्द्रबहादुर शाहीले प्रधानमन्त्री बालेन्द्र शाह (बालेन) विरुद्ध संसदमा कडा टिप्पणी गर्नुभएको छ। बुधबार प्रतिनिधिसभाको बैठक प्रतिपक्षीको अवरोधका कारण स्थगित भएपछि सञ्चारकर्मीहरूसँग कुरा गर्दै शाहीले प्रधानमन्त्रीलाई संसदको गरिमा जोगाउन र जवाफदेही बन्न चेतावनी दिनुभएको हो।
प्रधानमन्त्रीको साटो अर्थमन्त्रीलाई नीति तथा कार्यक्रमको जवाफ दिन रोष्ट्रममा पठाइएपछि शाहीले बालेनको कार्यशैलीमाथि प्रश्न उठाउनुभएको छ।
१. ‘र्याप र पप गीतका लागि संसद होइन’
प्रधानमन्त्री बालेन शाहको पृष्ठभूमि र उनको कार्यशैलीलाई लक्षित गर्दै शाहीले भन्नुभयो, "प्रधानमन्त्रीलाई संसद्मा पप गीत गाइदिन वा र्याप हान्न बोलाएको होइन नि! उहाँलाई त्यहाँ जनताका जल्दाबल्दा समस्यामा जवाफ दिन बोलाइएको हो।" प्रधानमन्त्रीले संसदलाई उपेक्षा गरेर भाग्न खोजेको शाहीको आरोप छ।
२. रास्वपालाई ‘पुरानो ऐना’ देखाउँदै शाही
शाहीले वर्तमान सत्तारुढ दल राष्ट्रिय स्वतन्त्र पार्टी (रास्वपा) लाई विगतको सम्झना समेत गराउनुभयो। "हिजो केपी शर्मा ओली प्रधानमन्त्री हुँदा उहाँ अनुपस्थित भएपछि यही रास्वपाका सांसदहरूले संसद अवरोध गरेका थिएनन् र?" शाहीले प्रश्न गर्नुभयो, "आज आफैँ सत्तामा पुगेपछि प्रधानमन्त्रीलाई संसद छल्न सिकाउने?"
३. प्रधानमन्त्रीको साटो अर्थमन्त्री अघि सरेपछि आक्रोश
नीति तथा कार्यक्रममा उठेका प्रश्नको जवाफ दिने कार्यसूचीमा प्रधानमन्त्रीको नाम भए पनि सभामुखले अर्थमन्त्रीलाई समय दिएपछि राप्रपासहितका विपक्षी दलहरूले सदन अवरुद्ध गरेका थिए। शाहीले प्रधानमन्त्री स्वयं उपस्थित नभएसम्म सदन चल्न नदिने अडान व्यक्त गर्नुभएको छ।
४. सुकुमवासी र महँगीको मुद्दा
ज्ञानेन्द्र शाहीले सुकुमवासी बस्तीमा डोजर चलाइएको विषय, वैदेशिक रोजगारीको ठगी र इरान–अमेरिका युद्धका कारण बढेको महँगी नियन्त्रणमा सरकार मौन रहेको भन्दै प्रधानमन्त्रीले यी सबै विषयमा स्पष्ट जवाफ दिनुपर्ने माग गर्नुभयो।
No comments:
Post a Comment